வயிற்றில் புழுக்கள்

மாவோயிஸ்ட் பயங்கரவாதம், சிவப்பு பீதி என்றெல்லாம் செய்திகள் உலாவும் இந்தத் தருணத்தில், ஜார்கண்டின் நிஜ பிரச்னையை அறிய இதோ ஒரு வாய்ப்பு.

குழந்தைகளின் வயிறு அளவுக்கு அதிகமாக வீங்கியிருந்தால் உள்ளே புழுக்கள் வசிக்கின்றன என்று அர்த்தம். ஜார்கண்டுக்கு கிழக்கே உள்ள சிங்பம் மாவட்டத்தில் உள்ள பழங்குடி மக்களின் நம்பிக்கை இது. வயிற்றில் இருக்கும் புழுக்களை வெளியில் எடுக்க பழுக்கக் காய்ச்சிய இரும்புக் குழலை வயிற்றுக்கு பக்கவாட்டில் வைத்து தேய்க்கிறார்கள். குழந்தை வீறிட்டு அழுதால் நிறைய புழுக்கள் இறந்துவிட்டன என்று அர்த்தம். குறைவாக அழுதால் குறைவான புழுக்களே இறந்துவிட்டதாக சோகம் கொள்கிறார்கள். ஆகவே, மீண்டும் ஒரு இழுப்பு!

குழ்ந்தைகளின் வயிறு வீங்குவதற்குப் பல காரணங்கள் இருக்கக்கூடும் என்கிறார்கள் மருத்துவர்கள். ஊட்டச்சத்துக் குறைபாடு, மலேரியா, குடல் காய்ச்சல், ரத்தப் புற்றுநோய் என்று காரணம் எதுவேண்டுமானாலும் இருக்கலாம். கண்டுபிடிக்காமல் விட்டுவிட்டால் உயிருக்கே ஆபத்து நேரக்கூடும்.

மருத்துவர்கள் அதிகம் இல்லாத பகுதி அது. அப்படியே இருந்தாலும், காசு கொடுத்து வைத்தியம் பார்க்கும் அளவுக்கு வசதியில்லை. மருத்துவருக்குக் கொடுக்கும் அளவுக்கு வசதி இருந்தால், வயிறு ஏன் வீங்கப்போகிறது? தவிரவும், ஊட்டுவதற்கு உணவே இல்லாதபோது, சத்துக்கு எங்கு போவது?

ஜார்கண்டில் உள்ள 24 மாவட்டங்களில் பதினேழில் உணவுப் பற்றாக்குறை நீடிப்பதாக அரசாங்கமே ஒப்புக்கொள்கிறது. உணவு கிடைக்காத குழந்தைகள் பட்டினி கிடக்கிறார்கள் அல்லது காட்டு எறும்புகளைப் பிடித்துச் சாப்பிடுகிறார்கள். சாப்பிடும் பொருளா என்பதை அறியாமலேயே இலை, வேர், கிழங்கு, பூ என்று கண்ணில் அகப்படுவதை உட்கொள்கிறார்கள். இரும்பு இழுத்த வயிறைச் சுட்டிக்காட்டி 'இப்போது என் வயிற்றில் புழு இல்லை தெரியுமா?' என்று சிரிக்கிறார்கள். 'சிகிச்சை' அளிக்கப்படும்போதே இறந்துவிடும் குழந்தைகளின் எண்ணிக்கையை அறியமுடியவில்லை.

இதை, இதை, இதை, இதை, இதை படித்துப்பாருங்கள்.